Að viðurkenndum bókara er þriðja önn bókhaldsnáms hjá NTV Promennt. Námið er ætlað til undirbúnings fyrir próf til viðurkennds bókara sem haldin eru af Prófamiðstöð Íslands. Prófgjöld eru ekki innifalin í námsgjöldum.

Lögð er áhersla á að tengja námsefni þeim lögum og reglum sem snúa að reikningsskilum og er gert ráð fyrir að nemendur hafi góða þekkingu á bókhaldi og því sem snýr að uppgjöri fyrirtækja.

Mikilvægt er að nemendur gefi sér góðan tíma í lestur ítarefnis samhliða vinnslu verkefna sem kennarar leggja inn. Námið er verkefnadrifið líkt og fyrri annir bókhaldsnámsins en rétt er að gera ráð fyrir töluvert meiri heimavinnu.

Próf til viðurkennds bókara eru mjög krefjandi og námsefnið er mikið. Aldrei er hægt að fara yfir allt sem gæti komið til prófs, en leiðbeinendur leggja sig fram um að fara yfir það helsta. Þátttakendur þurfa klárlega sjálfir að fara vel yfir ítarefni og sýna sjálfstæði í vinnubrögðum.

Þar sem kennsluefnið er viðamikið mælum við með að nemendur gefi sér tíma yfir sumarmánuðina í lestur og sjálfsnám til undirbúnings fyrir prófin um haustið. Námið er aðeins kennt á haustin samhliða prófunum en kennsla fer fram í helgarlotum, seinnipart föstudags og laugardaga.

Athygli er vakin á að nemendur séu með eigin fartölvur í þessum hluta námsins.